काठमाडौँ । नेकपा माओवादी केन्द्रले विभिन्न १३ वटा मापदण्डलाई आधार मानेर नेताहरूको कार्य विभाजन गरेको छ । जसअनुसार पार्टीका केन्द्रीय विभाग, केन्द्रीय जनवर्गीय संगठन तथा मोर्चाहरूको कार्य विभाजनमा समूहगत र क्षेत्रगत आधार तयार गरिएको छ । सो आधारअनुसार पार्टी अध्यक्ष, वरिष्ठ उपाध्यक्ष, उपाध्यक्षहरू र महासचिवसम्मका पदाधिकारीहरूलाई राजनैतिक, वैचारिक कामका साथै नीति निर्माणसम्बन्धी  विभाग र मोर्चाहरूका जिम्मेवारीमा केन्द्रित गरिएको आइतबार मातहतका कमिटीमा पठाइएको सर्कुलरमा उल्लेख गरिएको छ । 

यस्तै जनप्रतिनिधि रहेका केही पदाधिकारीहरूलाई नीति निर्माण सम्बन्धी विभागहरूमा केन्द्रित गरिएको माओवादीको भनाइ छ । यस्तै उपमहासचिव, सचिव, स्थायी समिति सदस्यहरू र केन्द्रीय सदस्यहरूलाई प्रदेशहरूको जिम्मेवारीमा केन्द्रित गरिएको छ भने प्रदेश इन्चार्जको नेतृत्वमा सहइञ्चार्जहरु, प्रदेश सभाको दल नेता, प्रदेश अध्यक्ष र उक्त प्रदेशमा कार्यरत स्थायी समिति सदस्यहरू रहेको समन्वय कार्यालय गठन गरिएको छ । जसमा सदस्यहरू थप गर्नुपर्ने भएमा समन्वय कार्यालयको सिफारिसमा केन्द्रीय कार्यालयले निर्णय गर्ने सर्कुलरमा उल्लेख छ 

यस्तै प्रदेश इन्चार्जको परामर्शमा जिल्ला इन्चार्जहरू तोकिएको छ भने महानगरपालिका इन्चार्ज र हाल जिल्लामा सहइञ्चार्ज रहेका नेताहरूको जिम्मेवारी यथावत राखिएको छ । यसमा आवश्यक परिमार्जन र सहइञ्चार्जहरु थप गर्नु परेमा समन्वय कार्यालयको सिफारिसमा केन्द्रीय कार्यालयले  निर्णय गर्ने माओवादीको भनाइ छ । 

यस्तै संघीय निर्वाचन क्षेत्र र प्रदेश सभा निर्वाचन क्षेत्रका इञ्चार्जहरुको कार्य विभाजन सम्बन्धित  समन्वय कार्यालयले गर्ने तय भएको एक नेताले बताए । ती नेताका अनुसार स्थानीय पालिकाहरूका इञ्चार्जहरुको कार्य विभाजन समन्वय कार्यालयले गर्ने र जबस, मोर्चा, विभाग लगायतका क्षेत्रमा प्रदेशमा कार्यरत केन्द्रीय सदस्यहरूको कार्य विभाजन पनि सोही समन्वय कार्यालयले गर्नेछ ।

यस्तै हालै विद्यार्थी संगठनको नेतृत्वमा उपाध्यक्ष तथा महासचिवसम्म रही बिदा भएकाहरूलाई पार्टीको केन्द्रीय प्रतिनिधि मनोनयन गरी सम्बन्धित प्रदेश र विभागहरूमा खटाइएको माओवादीले जनाएको छ ।  विद्यार्थी सङ्गठनबाट बिदाइ भएका अन्य पदाधिकारीहरूलाई सम्बन्धित प्रदेश समिति वा प्रदेशका  विभिन्न तहहरूमा समावेशी गरी समन्वय कार्यालयले कार्य विभाजन गर्ने बताइएको छ । 

यस्तै पार्टी एकता प्रक्रियामार्फत केन्द्रीय समितिमा समायोजन भएका नेताहरू, पार्टी केन्द्रीय  प्रतिनिधिको रूपमा खटाइएकाहरू, संगठनात्मक जिम्मेवारी लिनसक्ने केन्द्रीय ज्येष्ठ कम्युनिस्ट  मञ्च र केन्द्रीय सल्लाहकार परिषद्का सदस्य तथा केन्द्रीय विभागका सदस्यहरूको कार्य विभाजन सम्बन्धित प्रदेशमा रहेको समन्वय कार्यालयले गर्ने बताइएको छ  ।

यस्तै जनप्रतिनिधिहरूलाई राज्यको व्यवस्थापिका, त्यससम्बन्धी कार्यहरू र पार्टीको नीति निर्माणसम्बन्धी विभागहरूमा केन्द्रित गरिएको छ भने जनप्रतिनिधिहरूलाई सम्बन्धित निर्वाचन क्षेत्र रहेको भूगोलको पार्टी समितिका बैठकहरूमा नियमितरुपमा आमन्त्रण गरिने सर्कुलरमा भनिएको छ । 

यसैगरी भूगोल र जनप्रतिनिधिको जिम्मेवारीमा नरहेकाहरूलाई जबसरमोर्चाहरु हेर्ने जिम्मेवारीमा केन्द्रित गरिएको छ भने केन्द्रीय आयोगमा रहेकाहरुको जिम्मेवारी आयोग र आयोगका कामहरूमा मात्र केन्द्रित गरिएको छ । 

माओवादीका अनुसार केन्द्रीय विभागहरूको गठन तथा सदस्यहरू थपघट विभागीय इन्चार्जको सिफारिसमा केन्द्रीय कार्यालयले गर्ने छ भने आर्थिक उत्पादन संयन्त्र गठन गरी आर्थिक उत्पादनलाई अभियानको रूपमा सञ्चालन गर्ने निर्णय गरिएको छ । यसको गठन र सञ्चालन सम्बन्धी नियमावली तयार गरी केन्द्रीय कार्यालयबाट जारी गरिने बताइएको छ । सो विभागमा विशेष जिम्मेवारीको रूपमा पूर्वउपराष्ट्रपति पासाङलाई दिइएको छ । 

यसैगरी काठमाडौँ उपत्यकाबाहिरका विभिन्न जिल्लाहरूबाट काठमाडौँ आएर अस्थायी रूपमा बसोबास गरिरहेका पार्टी समर्थक र शुभचिन्तकलाई संगठित गर्नका लागि सम्पर्क समन्वय प्रदेशअन्तर्गत विगतमा सञ्चालित विभिन्न स्तरका सम्पर्क मञ्चहरूलाई सोहीअनुसार पुनः क्रियाशील गराउने निर्णय समेत माओवादीले गरेको छ ।